कर्जत (प्रतिनिधी) : कर्जत तालुक्यातील भोसे येथे दारूच्या नशेत गावातील नागरिक व महिलांना मारहाण, शिवीगाळ करून गावात नेहमी दहशत निर्माण करणाऱ्या महेंद्र तुकाराम चव्हाण, वय वर्ष ३१ या इसमास १४ दिवसांची कोठडी सुनावण्यात आली आहे. आरोपी चव्हाण याने भोसे येथील आरोग्य महिला कर्मचारी काही दिवसांपूर्वी कोविड बाबत व इतर कामकाज करत असताना त्यांना शिवीगाळ दमदाटी केली होती. तसेच हा इसम दारूचे नशेत गावातील नागरिक व महिला यांना मारहाण करणे, शिवीगाळ करत होता, गावात नेहमी दहशत निर्माण करत होता. त्यामुळे गावातील जनता भयभीत झाली होती. त्याच्यावर कर्जत पोलिस स्टेशन प्रतिबंधात्मक प्रस्ताव क्रमांक २/२०२१ सीआरपीसी १५१ (३) प्रमाणे प्रतिबंधात्मक कारवाई करून सदर इसमास १५ दिवसांसाठी न्यायालयीन कोठडी देण्यासाठी मा. प्रथम न्यायदंडाधिकारी यांना तसा प्रस्ताव सादर करण्यात आला होता.
मा. प्रथमवर्ग न्यायदंडाधिकारी कर्जत यांनी सदर बाबत म्हणणे ऐकून सदर इसमास दिनांक २२ जुलै २०२१ पर्यंत १४ दिवसांची कोठडी सुनावली आहे. सदर इसमास १४ दिवस स्थानबद्ध करून न्यायालयीन कोठडीत ठेवण्यात आल्याने भोसे गावातील जनतेने समाधानी होऊन कर्जत पोलिसांचे आभार मानले आहेत.
सदरची कारवाई-कर्जत पोलीस स्टेशनचे पोलीस निरीक्षक श्री चंद्रशेखर यादव, पोलीस जवान सुनील माळशिखरे, भाऊसाहेब यमगर,विकास चंदन यांनी केली.
