श्रीगोंदा (प्रतिनिधी): वर्तमानपत्रात प्रसिद्ध केलेल्या बातमीचा राग अनावर होवून महाराष्ट्र राज्य विज वितरण कंपनीच्या अधिकार्यांनी अभिव्यक्ती स्वातंत्र्यावर गदा आणत पत्रकारांचा आवाज दाबण्याचा प्रयत्न केला. याबाबत श्रीगोंदा पत्रकार संघाच्या वतीने निषेध व्यक्त करत या अधिकार्याविरुद्ध कायदेशीर कारवाई करावी, अशा मागणीचे निवेदन श्रीगोंद्याचे तहसिलदार प्रदीप पवार व पोलीस निरीक्षक रामराव ढिकले यांना देण्यात आले आहे.
याबाबत अधिक माहिती अशी की, दैनिक श्रीगोंदा सिटीझन वृत्रपत्रात दि.२९ जुनपासुन महावितरणच्या गलथान कारभारचा रोखठोक पर्दाफाश करणारे बातम्या प्रसिद्ध केल्या होत्या. या बातम्यांचा राग अनावर होवून वीज वितरण कंपनीचे उप लअभियंता अधिकारी अनिल गंगाराम चौगुले यांनी दैनिक सिटीझनच्या वृत्तांवर आक्षेप घेत वृत्तपत्राच्या संपादकावर श्रीगोंदा पोलीस ठाण्यात गुन्ह्याची नोंद केली.
श्रीगोंदा तालुक्यातील विविध सामाजिक, राजकीय, सांस्कृतिक, शैक्षणिक, बातम्या प्रसारित करणे हे पत्रकारांचे कर्तव्य आहे. त्यानुसार पत्रकार बातम्या प्रकाशित करत असतात. अनेकदा राजकीय बातम्यांचा रोष धरून वृत्तपत्रांवर आरोप प्रत्यारोप होत असतात. तसेच वाळू तस्करी, गौण खनिज व अवैध व्यवसायाबाबत लिखाण करून अनेकांच्या रोषाला बळी पडून माध्यम प्रतिनिधींना निशाणा केला जातो. वृत्तपत्र व पत्रकारांचे आवाज दाबण्याचे प्रकार सर्रास घडत असतात. असाच हा प्रकार आहे.
वीज वितरण कंपनीचे अधिकारी चौगुले यांनी वृत्तपत्रामध्ये प्रसिद्ध झालेल्या बातमीचा राग अनावर होवून त्यांनी श्रीगोंदा पोलीस ठाण्यात गुन्हा दाखल करुन पत्रकारांचा आवाज दाबण्याचा प्रयत्न केला आहे. या घटनेचा सर्व पत्रकार हे जाहीर निषेध करत असल्याचे निवेदनात म्हटले आहे.
यावेळी मराठी पत्रकार संघाचे जिल्हाध्यक्ष दत्ता पाचपुते, तालुकाध्यक्ष अंकुश शिंदे, बाळासाहेब काकडे, मिराताई शिंदे,चंदन घोडके,दादा सोनवने, योगेश चंदन, राजेंद्र राऊत, अर्शद शेख, जिल्हा ग्रामिण पत्रकार संघाचे तालुकाध्यक्ष सोहेल शेख,अनिल तुपे,दत्ता जगताप,राजु शेख, पीटर रणसिंग,संतोष गोरखे,मुश्ताक पठाण उपस्थित होते.
