दरम्यान, त्यांच्या सोबत असलेले चौघे पसार झाले आहेत. जिल्हा पोलीस अधीक्षक राकेश ओला यांनी पोलीस निरीक्षक दिनेश आहेर यांना जिल्ह्यातील फरार व पाहिजे त्या आरोपींची माहिती घेऊन त्यांच्याविरूध्द कारवाई करण्याबाबत आदेश दिले आहेत. नमुद आदेशाप्रमाणे निरीक्षक आहेर यांनी पोलीस अंमलदार भाऊसाहेब काळे, विजयकुमार वेठेकर, बापूसाहेब फोलाणे, अतुल लोटके, देवेंद्र शेलार, रवींद्र कर्डिले, विजय ठोंबरे, बाळू खेडकर, मयुर गायकवाड, बाळासाहेब गुंजाळ, चंद्रकांत कुसळकर यांच्या पथकाला कारवाई करण्याबाबत सूचना दिल्या होत्या.पथक कर्जत तालुक्यातील मिरजगाव परिसरात फिरुन पाहिजे व फरार आरोपींचा शोध घेत असताना माहिती मिळाली की, घोगरगाव ते कोंभळी जाणाऱ्या रोडवर थेरगाव शिवारात लिंबाच्या बागेमध्ये 6 ते 7 इसम दरोडा घालण्याच्या तयारीत बसलेले आहेत. निरीक्षक आहेर यांनी पथकाला नमुद ठिकाणी जाऊन खात्री करून कारवाई करण्याबाबत सूचना दिल्याने पथकाने नमुद ठिकाणी जाऊन वाहन रस्त्याच्याकडेला लावून पायी चालत बॅटरीच्या उजेडात खात्री केली असता काही इसम दबा धरून बसलेले दिसले.
पोलीस पथक अचानक छापा घालून पकडण्याच्या तयारीत असताना संशयित इसम पोलीस पथकाची चाहुल लागताच पळून जाऊ लागले. पथकाने लागलीच पळत जावून तीन इसमांना ताब्यात घेतले व चार इसम अंधाराचा व झाडा झुडुपाचा फायदा घेऊन पळून गेले. ताब्यात घेतलेल्या इसमांची पंचासमक्ष अंगझडती घेतली असता त्यांच्याकडे एक तलवार, दोन लाकडी दांडके, एक गलोल व मिरचीपूड मिळून आल्याने त्यांचेकडे सखोल चौकशी करता त्यांनी मिरजगाव परिसरात दरोडा घालण्याच्या तयारीत एकत्र जमल्याची कबुली दिल्याने त्यांना ताब्यात घेतले. त्यातील दोघांना अटक केली आहे. त्यांच्याविरूध्द मिरजगाव पोलीस ठाण्यात गुन्हा दाखल करण्यात आला आहे.
सदर कारवाई अधीक्षक ओला, अप्पर अधीक्षक प्रशांत खैरे, उपअधीक्षक अण्णासाहेब जाधव यांच्या सूचना व मार्गदर्शनाखाली स्थानिक गुन्हे शाखेचे पोलीस अधिकारी व अंमलदार यांनी केली आहे. अटकेतील दोघांकडे चौकशी केली असता पळून गेलेल्या चौघांची नावे समोर आली आहेत. यामध्ये स्वामी सर्जेराव चव्हाण (रा. घोसपुरी ता. नगर), रमेश सुरेश चव्हाण (बेलदार, रा. सिंदखेडराजा, जि. बुलढाणा), सूर्यभान कुंडलिक काळे उर्फ टोण्या (रा. मांडवगण ता. श्रीगोंदा), अशोक किंद्राश्या भोसले (रा. मांडवगण ता. श्रीगोंदा) यांचा समावेश आहे. पथकाने त्यांचा शोध घेतला असता ते मिळून आले नाहीत.
